【主動冒險】
2016年10月20日(四)
今早，我幫一位伯伯申請關愛基金假牙津貼，如往常一樣，完成所有手續後，我帶伯伯到樓上牙科診所參觀，等佢了解診所環境，到下月應診前有個心理準備。
完成使命，我陪伯伯等lift, 我返樓下中心工作，伯伯落地下離開。
等lift期間，我望見一個灰白髮男士推住輪椅，輪椅上坐住一個頭髮又亂又短嘅婆婆，婆婆非常瘦，瘦到我忍唔住上前慰問…
我微笑問男士：「婆婆胃口好嘛？係咪嚟整假牙？佢睇嚟比較瘦，有冇飲奶呢？」
男士同佢身邊位女士答：「係！嚟整假牙！胃口麻麻，有飲奶！」
入lift後，我繼續問：「係咪加營素？每次沖幾多殼？」
女士答：「係！6殼！」
我唔想俾婆婆走，於是主動提議：「我係老人中心社工阿肥姑娘，你哋趕唔趕時間？介唔介意我同你哋傾一陣？」
兩人一齊回應：「好！唔介意！」
於是，兩個人推住婆婆，同我一齊出lift。
一個半小時嘅面談，一個令人心酸嘅故事…
一如我所料，男士同女士係婆婆嘅仔仔同新抱。
婆婆，93歲，以前一直獨居，係我哋中心前會員。以前不時上嚟中心食飯，但四年幾前，患咗認知障礙症，再返唔到嚟中心。
由於自我照顧能力差，仔仔同新抱兩年前搬過嚟同婆婆一齊住，以便照顧。
隨住婆婆病情惡化，認知能力同體能越嚟越差，仔仔同新抱日唞出外返工期間，婆婆喺屋裡屋外跌過幾次！今年三月，跌到右邊股骨折斷，被送入醫院做手術。
四月出院，醫生同醫務社工建議婆婆入住老人院，兩人頓感徬徨無助。醫務社工叫仔仔等婆婆出院後搵老人中心幫手申請政府院舍，呢段時間搵住間私家老人院俾婆婆住住先。
仔仔唔知從何入手之際？其後得知鄰居個囡囡嘅阿叔喺深水埗開老人院，可以收平啲…
點知7月16日送婆婆入去住，兩星期後就要緊急退院！
入住第二日，老人院將婆婆本來及肩嘅頭髮，剃剩少過一吋！(仔仔俾手機裡張相我睇)
三日後，唔見咗婆婆下排副假牙！
第10日，婆婆喺老人院跌倒，左肩骨裂！醫院幫婆婆整咗手托肩帶出院，老人院竟然話冇見過！
第13日，下唇損埋！
8月1日，仔仔帶婆婆到醫院覆診後，決定退院，湊婆婆返屋企照顧。
到今日(10月20日)，我同佢哋偶遇，婆婆返咗屋企近兩個半月。
屁股有啲損、瘦到得排骨、打緊破傷風針…
我頓感奇怪！打破傷風針？
原來，婆婆九月中喺屋企又跌多次！今次跌損咗個頭，傷口喺耳背附近。
婆婆啱啱由另一間老人中心社工幫手申請買位院，輪候指定院舍，但我估計，至少要等一年半或以上…
每日中午12：30到晚上7：00，夫婦兩個出外返工，逼不得已要將婆婆用帶綁喺床上！
晚上7：30，返去煮飯、餵飯、幫婆婆換片沖涼換床舖，往往攪到凌晨先可以「收工」！
新抱講講吓開始喊！我覺得咁樣落去絕對唔係辦法！
我，一定要盡力幫佢哋諗辦法！
我由揀尿片、換尿片、餵食、認知障礙症護理開始講起，同仔仔同新抱分析輪候社區照顧服務或再送婆婆入住私院嘅利弊。
我，即時打咗電話俾三間私院同合約院舍嘅院長…
打到最後一間，幾年前，一位醫務社工介紹、環境優美、有佛教背景、我哋合力送過兩位獨居長者入去住，兩個都住得好好嗰間…
有位！！！！！
院長聽完我講婆婆嘅情況，答應盡力幫忙！
我將呢個好消息話俾仔仔同新抱聽，將院舍單張交俾佢哋，建議佢哋盡快入去睇環境，同院長商量一下…
仔仔同新抱坐言起行，話等陣即刻去！
今日，我早上當值，因工作太多，結果遲咗一個鐘先放工。
就喺我行往地鐵站期間，咁啱同仔仔新抱喺街上相遇…
仔仔同新抱表示好滿意院舍環境，感謝我嘅幫忙！
我再三向佢哋表示唔駛客氣！我只係將自己所識嘅嘢同佢哋分享，同時再三強調，我其實唔清楚院舍內部運作，亦唔能夠完全保證院舍嘅服務質素。
仔仔新抱表示絕對明白！
大部份社工同行都唔會介紹老人院俾老人家同家屬，只因少做少錯，唔做唔錯，費時出事時要孭鑊！
但，我嘅諗法同大家唔同…
所謂：「將心比己，感同身受」…
肥媽2005年9月8日突然中風，兩星期內依然大部份時間昏迷，聯合醫院醫務社工只冷漠地遞咗張私家老人院名單我，叫我盡快搵一間院安置肥媽，因醫生隨時有機會要肥媽出院！
我雙手接過私院名單，眼淚一直冇停止過…
我冇同個社工講，其實我都係社工…
當時嘅我，眼淚已模糊視線，懼怕已震動心靈…
如果，婆婆唔係俾私院整唔見咗副下排假牙，佢就唔會嚟我機構牙科診所整假牙，我就唔會有緣遇到婆婆…
或者，冥冥中總有一啲註定…
我只希望婆婆能夠減輕痛苦、平平靜靜行埋人生最後呢段路…
一段痛苦、委屈、無助，但無法拒絕嘅單程路。
Search